mineena's photostream

mineena's photostream on Flickr.

ومن الصوف ما يخرج من الملة..!!!

طبعا انا دايما في مقالتي المتواضع واللي هي..كلها 3 مقالات..يعني بحاول اخش في الموضوع بس بطريقة تانية..المقدمة تكون ماليها اي ستين لازمة..لكن في الموضوع ده بجد حدخل على طول لانه انا وشوية وانفجر...واهم شي اهم شي انه مافي فايدة بس اكتب..وعبر!!!والساكت عن الحق!!!!؟

الليلة حتكلم عن موضوع حساس شوية بس لازم اتكلم فيه عن الصوفية..والطرق الصوفية..وعمايل الصوفية..وطبعا في ناس كتيرة حتبهدلني عشان انا حتكلم في الموضوع ده بس ده راي..وانت اللي حتهاجمني ده رايك وكل زول يعمل اللي عاوزه واللي بريحه؟؟؟

ربنا سبحانه وتعالى خلقنا واوجدنا في الكون عشان نعبده ولا نشرك بيه شيئاً..وده من حقوقه علينا اننا نعبده بالطريقة الصح واللي هو وراها لينا عن طريق رسله صلوات الله وسلامه عليهم..وربنا ارسلهم مبشرين ومنذرين..بثوابه وعقابه..ومن القران الكريم والسنة النبوية عرفنا العبادات اللي من واجبنا اننا نعملها..واللي هي بترفع من درجاتنا وحسناتنا في يوم الحساب...

وكل اللي عرفنا عن التوحيد والدين سواء عن طريق الوحي او الكتب السماوية او حتى عن الانبياء وسلوكهم في الحياة الدنيا مابتغير وبتكون هي دي مرجعيتنا الثابتة في العقيدة واصول الدين واسس ومنهج لايتغير في الحياة الدنيا باختلاف الزمان والمكان الا ان تقوم الساعة...

ومن بعد القران والسنة النبوية بنجي لصحابة والتابعيين والسلف الصالح رضوان الله عليهم لانهم هم الناس اللي عاشت مع الرسول عليه الصلاة والسلام او حتى بعد عهده..هم ماتركوا سنة من سننه عليه الصلاة والسلام او سنة نبي قبله وفعلها النبي الا وقالوها وعملوا بيها..غير عن انهم كانوا اهل تقى وورع وزهد..وتقوى الله والخوف منه كان هو هاجسهم وخوفهم الوحيد المسيطر على كل كيانهم وتفكيرهم..ومراقبة الله عز وجل ليهم في افعالهم واقوالهم..حتى كانوا يخافوا انهم يظلموا الدواب وانهم يتسالوا عنها..والواحد في الفترة فترة الصحابة والتابعين يعني اذا ارتكب معصية بييمشي ويقول لامير المؤمنين عشان يقيم عليه الحد خوفاً من عذاب الله..لكن ده زمن ولى وما حيرجع واللي نحن هسي فيه زمن تاني خالص!!!

فاذا الانسان عاوز يتعلم دينه بطريقة صحيحة يرجع للقران ويتفكر في ايات الله..ولسنة النبي عليه الصلاة والسلام..ولسيرة السلف الصالح ويقرا عنهم..ده للي عاوز يعرف..اما اللي هو ماشي في طريق ما عشان اهله كانوا كده وبس مقفل راسه على الجانب ده اسمح ليه انت انسان بس بتقلد!!!

عشان الناس تعرف هم ليه اسمهم صوفية في رأين..ناس بقولوا من الصوف عشان ثقيل وحار والحركة فيه صعبة وده دليل على الزهد والورع عندهم انك تعذب نفسك..والراي التاني انها مشتقة من كلمة"سوفيا" يونانية معنها الحكمة !!!!!حكمة!!
طبعا وهي طرق كتيرة ومختلفة عن بعضا لكن بتفقوا في حاجات..الزهد!!الورع!!التقوى!!الايمان!!الاولياء الصالحين!!علم الغيب!!مزارات القبور!!الوحي......الخ!!!

طبعا شيوخ الصوفية والمريدين وغيره من اتباعهم عندهم اعتقاد انه الزهد والورع وترك الدنيا وملذاتها والتعبد والاعتكاف والله اعلم تاني شنو بانه الحاجات دي مابتحصل الا اذا تعبت نفسك..ولبست صوف..يدعوا البساطة وعدم التكلف؟؟!!لا بجد!!!

وبداية الطرق دي انه واحد بيسافر من مدينته وبيمشي لابعد مكان في الدنيا..مكان خالي..صحرا..ولوحده..عشان يتعبد..فبيقصدوا الناس عشان يتعلموا منه اسرار المهنة..وبكده بتبدا الوفود تجيه من كل مكان في العالم..ولما يموت بخله اقرب ما يكون للاله المعبود!!!هو اعتكاف المساجد غيره!!!

 وعندهم اعتقادات كتيرة..زي اعتقادهم انه الله عز وجل هو الكون وهو الوجود!!!يعني كل الايات اللي عن خلق السموات والارض ما كفية!!!وفي اعتقاد بقول انه فرعون ده الموحد..هو اللي قال انا ربكم الاعلى فهو انسان امن بفكرة التوحيد!!!واخناتون مشى وين؟؟؟وطبعا ما وقفوا لهنا لا قالوا محمد عليه الصلاة والسلام هو الله !!!؟؟؟؟تعال الله عما يصفون!!!!

وطبعا هم اغلب شيوخهم بدعوا علم الغيب!!وانه الوحي بجيهم !!!يعني انت بنزل ليك الوحي!!؟!كيف؟؟!؟!؟!!!

والكلام ده مكتوب في كتبهم وانا قريت جزء من كتاب لي واحد اسمه الشعراني وفيه خزعبلات وعقائد ما انزل الله بها من سلطان من كلامه اللي يصدم انه الوحي بجيهم..وده شخصياً للاولياء!!يعني حلقات الوحي دي مابحضرها الا الكبرات!!!وانه لما الوحي يجيهم لازم يكونوا ربي كما خلقتني!!!!!!!!؟؟؟!!!!!!!

وما اثار دهشتي وفجعني..انهم بقولوا انهم كانوا فوق في السماء السابعة مع رب العرش الرحمن الرحيم؟؟لا بجد!!طيب موسى عليه السلام اللي هو اختص بكلام ربنا ليه من دون وحي انتوا احسن منه في شنو!!ولو انتوا فوق ليه نزلته؟!!؟!

وما اثار دهشتي وفجعني تاني..انه اذا بعض من ابتاعهم من الطريقة اشركه مع شيخهم الكبير الحالي شيخ تاني يبقى هو كفر وشرك بالله وبكون خرج من الملة والعقيدة والدين وكله لانه في رايه الشيخ الكبير يعني انه هو الولي الاوحد وهو اللي بتلقى الوحي واللي واللي!!!!

والبعض منهم من المريدين والاتباع يعني بشوف الشيخ اللي هو ولي صالح احسن من الانبياء وده بتمثل في مقولة شهيرة ليهم "خضنا بحراً وقف الانبياء بساحله"!!!!!!!!!!!لا بجد؟؟؟الساحل الشمالي!!!!!وعبرتوا كيف!!بالتايتنك!!!

غير عن انهم يتحججوا بالمعجزات اللي ربنا خصاها للانبياء صلوات الله وسلامهم عليه وبقولوا انهم هم اللي عملوها وانها بتظهر لما هم يعوزه يستخدموها!!!ونسوا انه ربنا في القران الكريم خاطبهم  بصيغة الامر؟؟!!!!؟يعني هو اللي امرهم وهو اللي وهبها ليهم!!

غير عن انه عندهم علم ظاهر اللي هو قران..سنة..اجماع..قياس..اما العلم الباطن ده هو اللي قلته قبل شوية الوحي..واحد بقول حدثني قلبي عن ربي!!!!!!!استغفر الله العظيم واتوب اليه!!اي ده!!

واللي بقول الرسول عليه الصلاة والسلام بجيهم عشان يوريهم العبادات اللي مفروض يعملوها؟؟؟؟يعني 63 سنة عرفنه والباقي مجهول وحصرياً لشيوخ الصوفية؟؟؟

واللي بحير انهم بقولوا انه شي طبيعي انه الصوفية تنتشر في افريقيا بصورة واسعة لانه العبادات الافريقية وثنية!!!يعني بالعربي لانه الصوفية قريبة من الشرك!!!

وهم زي ما قلت بدعوا الورع والزهد والبعد عن الدنيا لكن في السودان لما قامت مملكة الفونج اتحد كل شيوخ الصوفية مع سلاطين الفونج عشان يسقطوا الدولة المسيحية؟؟؟وين الورع ده!!وما تقولوا عشان الدولة الاسلامية انت يا شيخ لو عاوزة الاخرة بتبعد نفسك عن اي سياسة!!!وده المبدئ حقهم انهم ماعاوزين يكونوا سلاطين!!!

طبعا انا لاحظته في زعماء وشيوخ الطريقة من مظاهر الورع والزهد والتجرد من كل ملذات الدنيا انه العربات اللي راكبنها شي مبالغ فيه..لكزس!!مارسيداس !!اودي.....الخ من العربات!!!والبيوت..والفلل..والعقارات..والاستثمارات..وتجارة زئبق احمر!!!!؟؟

وفي النهاية بقولوا انهم مابتجيهم اي حسنات ولا بياخدوا فلوس وانه ده من الله الخير والنعيم من الله!!!طبعا يا جماعة انا وانتوا لازم نقول انه ده جايز..يعني الواحد يكون قاعد في مكانه غير الذكر وحلقات الذكر وتعليم الطريقة لناس وفجاة خزنة من السما تنزل ليه لانه ولي!!!!!؟؟!!يعني اسعى ياعبد وانا معاك نسوها تماماً!!!!!!؟؟!!!ماهذا!!
والانبياء اللي كان نجار..واللي كان حداد..واللي كان خياط..وحطاب!!؟؟نسيت صح هم عبروا البحر!!!

ده غير عن القباب..شيوخهم  والاولياء الصالحين لما يموتوا بعملوا ليهم قباب..وبتكون دي مزارات طبعاً مناظر نسال الله السلامة..اللي بيسجد..واللي بياكل التراب اللي حولين قبر الولي..واللي بجيب معه هدايا ليه..للميت يعني!!!ويسالوا قضاء الحاجات!!!ونسوا الاية"إن الله هو الرزاق ذو القوةِ المتين"!!

واللي يزعل انه لما واحد يحلف بالشيخ ولا الولي ده بكون صادق ولا يمكن ماينفذ الشي اللي حلف بيه..لكن اذا حلف بالله ممكن يكون بكذب؟؟!!؟ربنا لما نزل ع الجبل خرا موسى صعق؟؟؟الله لدرجة دي لفظه بقى كده!!؟!؟

انا مرة مشيت حولية وطبعا هنا في السودان طرق الصوفية اكتر من شعر الراس..المهم مشيت لحولية حلقة ذكر يعني طبعا لشيخ العربات والشيكات والبنوك والجكس!!!لا بجد حسيت نفسي في بنك..خزنة عم ذهب!!!!تاني عم ذهب!!!

 طبعا هي ذكر وشعارهم الا بذكر الله تطمئن القلوب..لكن ذكر يعني بجد ولا برنامج رقص؟؟اقرب ما يكون لرقص الافريقي!!!!!؟؟يعني الا بذكر الله تطمئن القلوب بالطبلة والرقيص؟؟ولا بقولوا ده الجسد منطرب من الذكر عشان كده برقص!!!!؟؟؟!!!؟!

غير عن انه بقول الشيخ اللي مشيت حوليته ده انه بيفصل النساء عن الرجال بالستار في حلقات الذكر!!!اي حاجز ده!!ياسبحان الله!!ولما ظهر القائد..البطل المغوار ده عيني تشوف العجائب..يبوسوا رجلينه ويدينه؟؟؟هو انت احسن من محمد عليه الصلاة والسلام!!!

واحلى شي في القصة انه حلقات الذكر لايمكن تقف لصلاة بالذات صلاة المغرب لانه ده زمن الحلقات!!!يعني تاخير الصلاة  عادي من دون عذر عشان الذكر؟؟!!؟

ده حتى مرة في موسم المطر في حفر بتكون معمولة عشان تصرف موية المطر..وعشان تمر للنحية التانية بتكون في خشبة تعدي من فوقها..او حتى ممر..لكن مافي خشبة ولا في ممر..نعمل شنو؟؟!!واحد من طلابه ومتبعيه عمل روحه سوبرمان!!؟!اتسطح على بطنه عشان يمر البطل المغوار من فوقه؟؟؟من فوق جسمه؟؟!!!؟؟! عشان الاجر ياجماعة ماتفهموا غلط!!!!

ومن مظاهر البدع الاحتفال بالمولد..مفروض شوية تبكوا وشوية تفرحوا لانه في نفس اليوم مات؟؟!!؟؟

يعني ده انا حاولت اختصر الكلام..لكن بصراحة ربنا الكلام عنهم كتير..الواحد بيزعل على الناس اللي بتصدق الكلام ده ومقتع بيه وناسية انه شيخه ده هو مخلوق زيه مافيه شي زايد..الانبياء كلهم صلوات الله وسلامهم عليه كانوا بشر زينا وربنا اكرمهم بالاخلاق الفاضلة والحميدة  والمعجزات واختصاهم برسالاته..وغير انه الصوفيين مقتنعين انه طرقهم مافيه اي نوع من الشرك..طيب السجود والدعاء والتوسل ده بسموا شنو؟؟؟!!!!؟؟سواء هو حي او ميت لا يملك ضر ولا نفع؟؟ولو هو بيملك ضر او نفع كان الرسول عليه الصلاة والسلام نفع عمه ابو طالب وخلاه يسلم!!!ونوح عليه السلام وولده!!نسيت تاني انتوا اللي عبرتوا البحر؟؟!!!

ربنا ما بطلع على غيبه احد..ولا معه شريك..وكلنا مطلوب مننا عبادته وبس..واللي ادعى انه ولي وانه احسن زول ما قصد الا الخراب والشهرة والمال وكل مظاهر الرياء والخداع..لانه الانسان اللي فعلا عاوز الاخرة ورضى ربنا عليه لايمكن يقول كلام زي ده لانه عارف انه الجنة والنار والعذاب والعقاب والثواب مابيجي الا برحمة ربنا اولا بعدين بالاعمال..وبالعبادة والتقوى والخوف من الله مش الكذب وتضليل الناس!!!ولو انتو فعلا بتتبع الشرع كنت امنت بالايات وصدقتها لما ربنا قال في القران وفي مواضع كتيرة انه هو لا اله الا هو..وانه السجود وغيرها من العبادات ما بكون الا ليه واحده سبحانه..وانه هو اللي بيرزق..وهو اللي بيشفي..وهو اللي بيحي ويميت!!مش انت؟؟ونحن مامحتاجين ليك..لانه نحن الله كرمنا بانه ماجعل بينا وبينه واسطه ولا شيخ ولا غيره!!اي انا بطلب من اي انسان انه يدعي لي حتى لو فاسق لانه الناس بتدعي لبعض وبتتمنى لبعض الخير..ورسولنا كان بيدعي انه يسلم احد العمرين واسلم عمر بن الخطاب..لكن بعد وفاته مافي انسان عاقل حيطلب من ميت يسوي ليه شي...كل اللي بقولوا الله يهديكم ويهدينا اجمعين...

وفي النهاية خليتوا اليهود يلقوا فرصة فينا ولقيت مقالة عن واحد برضوا زعلان من الحاصل واقتبس من كتاب لواحد مستشرق يهودي اسمه جولد زيهر بقول في كتابه "بقى كثير من عناصر الديانات السابقة للإسلام، واستأنفت حياتها في المظاهر العديدة الخاصة بتقديس الأولياء. وفي الحق ليس من شئ أشد خروجاً على السنة القديمة من هذا التقديس المبتدع المفسد لجوهر الإسلام والماسخ لحقيقته، وإن السنى الصادق الحريص على اتباع السنة لا بد أن يعده من قبيل الشرك الذي يستثير كراهيته واشمئزازه" ويتحدث عن تقديس العامة للأولياء، فيقول: "وأضرحة الأولياء والأماكن المقدسة الأخرى هي موضع عبادتهم التي يرتبط بها أحياناً ما يظهره العامة من تقديس وثني غليظ لبعض الآثار والمخلفات، بل إن العامة تخص الأضرحة ذاتها بمالا يقل عن العبادة المحضة" ويتحدث عن الولي المحلي: "ويخشى الواحد منهم أن يحنث في يمين حلف فيه باسم الولي أكثر مما يحمر خجلاً عندما يحلف بالله باطلاً النصوص السابقة من كتاب العقيدة والشريعة ص234,232

 georgiaelbit…ramzeleilla!!!

مطب صناعي...!!!

المطبات اللي في الشارع ابتكار عظيم عشان يقلل من سرعة العربيات بذات في شوارع المدارس والمستشفيات..و طبعا الصغار بحبوا جدا معارفة ليه!!يالعيبين انتو...ياجامدييييييييييين!!!ليه بتحبوها؟؟؟على قولة باسم هواي؟؟؟هواي!!!

والدليل على كده انه لما العربية تجي في شارع فيه مطب على طول بقولوا وبصوت واحد"ااووووباااااا أو هيييلااا هوبااا" المهم يعني كل مطب ليه شكل وحجم في مطبات بتكون حلوة ومتينة كده واطية دي بنلقها في حتات زي الوزارات؟؟في مطب طويل ده بكون ناس الحلة عاملنه..مجمعين القروش من كل قرد ف المنطقة وكده...حتى في مطبات سبحان الله بتلقها مقسومة نصين!!يعني الشارع في نصه او في الطرف مستقيم والباقي مطب!!!!!!!

لكن في مطب كده الناس كلها بتكره..وبالتحديد الرجال..عشان العربات يعني بتحك بتحت وكده وبتتكسر..لكن!!لكن!!لكن؟؟؟في مطبات كده الراجل بحبها جداً؟؟؟سوري يعني على الكلام الخطير ده..بس انا عاوزة اتكلم عن يعني ماهو لازم اجيب لي مقدمة ماليها اي لازمة عشان دي حركتي!!!مابخش في الموضوع طوالي:)!!!

هاااييي انتوا..هاااييي انت..هاااايييي انتيييييييييي يابت..الليلة حتكلم عن موضوع المطبات..اللي شغالين يعملوا فيها بنات خلق الله كلهم..عن عمليات التجميل..والتسمير..والهبل الطالع علينا اليومين ديل؟؟؟

عمليات التجميل!!وما ادراك ما عمليات التجميل!!انا من مكاني المتواضع ده بديكم مصطلحات جديدة اهديها كمان لناس في بيتنا طبيب..ناس جويل وبتوكس وغير..بدل عمليات تجميل لانه بجد هي لا تجميل ولا حاجة..عمليات تضريب..تسطير..تكفيت..توريم..الخ!!!

يعني الواحدة بجد بتنفخ شفايف..خدود..جفون..شد..مناخير..وصدر..ووووحاجة اخير نقول"جينيفر لوبييز "بتنفع؟؟وصلت!!!اوك نكمل؟؟

الواحدة بقت ماشة وفي جسمها  كمية من المواية"السيليكون"بتكون زي ممبع نهر؟؟لا بجد لو جبنا بنات لبنان وصبايا الشام والخليج وكل بنات الوطن العربي وشلنا كل المواية اللي في اجسامهم دي بجد نهر جديد بكفي يحل مشلكة المواية حقت النيل؟؟مشكلة الصومال؟؟اي مكان..ماعلينا!!!

لا ومن كتر الورم والنفخة في الجسم كله شوية وتبقى منطاد وطييييييييييييييييييييييير..؟؟؟بهيج!!اقصد باربي البوتوكس...طيري انتي؟؟؟؟؟

لا بجد كل شي يزيد عن حده ينقلب ضده..يعني بنشوف المثل ده باشكال مختلفة من البنات..يعني الوش متورم!!يعني بدل الحقن والالم وتدفعي دولارات بس تنادي اخوك كفين هنا وبوكس في الشفايف وبقتي متورمة..مطبات في كل الوش!!! يعني الوش كله متورم الخدود عبارة عن رمان..والمناخير يا ام بريتها زي قلم الرصاص؟؟؟يانفختها زي نانسي وبقت حبة كرز؟؟!!!!

وياعيني على الشفايف..المطبات..!!!براطم الجمل!!!؟؟؟لا ده فعلا المطبات لانه في الشارع بكونوا مطبين؟؟ودايما بكون متورم!!!واخيراً عرفنا ليه الصغار بحب المطبات؟؟؟يالعيبيييييين!!!ياجامدييييين؟؟!!!!!!!

قدامك صورتين صورة بت شفايفها سابقها 10 متر لقدام..وصورة الجمل؟؟؟؟؟!!!اوجد الفرق؟؟؟

والواحدة اذا اتكلمت طبعا مش بساهل تحسها وهي بتتكلم زي ورق الالة الطباعة القديمة يمشي يمين ويسار..طابعة!!حتى غسالة يمين ويسار!!!وفي الاخير والنتيجة النهائية للوش المنفوخ بتكون نفيخة المنفيخووو!!!لولو الصغيرة لولو..!!!

ده ولسه الصدر..لا بجد النسوان شغالين عمليات تكبير وبس!!تصغير مافي الا ما رحم ربي؟؟؟بكون وزن تقيل في الجهتين؟؟؟وتاني بقولها مافي بت الا ما رحم ربي بتعمل عملية زي دي وبالذات دي الا عشان الرجال؟؟؟بصراحة بتبقى عندها مخدات..وسادات؟؟يا نبع الحنان انتي !!!!واللي بحير بعد ده كله انه مابتتعب في مقاسات الملابس داخلي وخارجي؟؟؟

ومابكفيهم بعد ده كله..القصة مابتنتهي لهنا..مسك الختام تكبير ارداف؟؟؟؟البرازيل جات عندنا؟؟؟اخ قلبي خلاص جد!!!

عاوزة اعرف يعني مع الكمية الهايلة من المواية في الجسم دي وبعد كده بتنادوا بالرشاقة..والنحافة..ورجيم..وجججممم؟؟؟كيف بيقوا ديل مع بعض؟؟؟علاقة طردية!!!!

وما انتهينا..لا يعني الراجل الشرقي طلع زي كورة الطاولة بيلعبوا بيك وانت ولا عارف اي حاجة خالص بس بتتهبل على اي بت بتجي مارة..لدرجة انك مابتلاحظ انهم بقوا اشباه بعض..كلهم نانسي ؟؟؟فعلا مطب صناعي!!!

وطبعا لسه زي ما قلت..التسمير..بالشمس..صناعي..بدرة..كريم..مجموعة كريمات تسمير؟؟؟الواحدة لما تسمر روحها بصراحة ربنا بتكون برتقالة برجليييييييين؟؟ميراندا برتقال؟؟؟ لون بجيب الجلطة؟؟؟ الرجال مفروض يكون لابس 24 ساعة نظارة الشمس لانه دي هي الاشعة تحت الحمراء!!وشخصياً!!دي الشمس جاتكم لحدي عندكم؟؟زي ما قلت ام كلثوم ونــقــول للــشــمــس تـعـالي تـعـالي!!!!!!

احلى حاجة في الموضوع انهم بنتقدوا في السمر والبرونزيات بشااااااااااااااكل عجيب؟؟؟؟الا صحيح على طاري السمر انا متاكدة انه جوا كل بنت سمرا في بات مان!!!بتمونة!!؟؟

في الزمن ده حتى السمر بقوا عاوزين يبقوا بيض..وتعالي يا كريمات التبيض وديل ياحرام بكونوا مساكين لانه البيض عندهم اشعة وبنفسجية..وشمس..وبدرة..وكده!!!لكن ديل السمر والسود ياعيني؟؟؟

الواحدة فيهم بتكون اوضة نومها عبارة عن صيدلية..اي كريم تبييض عندهم ولا في احتياطي بتلقى من كل كريم علبتين؟؟؟وكل اليوم تخت في الكريمات وتعبانة على روحها صباح ومساء!!!فعلا طبقة كادحة وحياة شقاء؟؟؟!!

وبعدما تصل للون اللي هي عاوزة بتقلب وطواط!!!مابتطلع بالصباح عشان الشمس وكده يعني..وطلعتها كلها بالليل؟؟؟مش قلت بات مان!!!اهو بقى شخصية حقيقة!!!لو الواحدة فتحت لونها شي بسيط زي ناس لوريال وجارنييه مامشكلة..لكن اللون يختفي تماماً!!!

لا بجد كل فترة بالذات فترات المواسم رمضان واجازة الصيف تكتر الافلام والمسلسلات..لما افتح التلفزيون بس عبارة عن اوجد الفرق!!!كل واحدة بتكون متغير فيها شي ويلا ياجمهور ابدا لاحظ..ده حتى مرة في برنامج جويل...والله بحب موت ياجويل بس جد الحلقة كانت مقتطفات المهم الحلقة كانت عبارة عن قبل وبعد!!!!!

لا بصراحة ربنا نحكي بصراحة اكتر شعوب متناقضة الشعب العربي..اذا انت بتكرة البيض عاوزة تبقي بيضا ليه؟؟؟وانتي يا بيضا بتكرهوا السمر ونفسكم تبيدوهم بتحاولوا تشبهوا بيهم ليه؟؟وما تقولوا البرازليات وغيره الانه الشفايف الكبيرة ومناخير نانسي دي والارداف الكبيرة ده كله في السمر سواء برونزيات ولا حنطيات ولا سود؟؟؟وبالصراحة ربنا مافي بت بتعمل الكلام ده لروحها..لدرجة دي هانة روحك عليك؟؟؟

اذا الراجل بحب السمراوات مشكلته يهاجر البرازيل!!!واذا بحب البيض الروسيات بلدهم زحمة بتلقوا كمية؟؟؟ليه الواحدة بتغير شكلها عشان الموضه؟؟؟يلعن ابو الموضه اللي خلتكم ماعندكم ثقة؟؟!!؟انا ماضد انه الواحدة تغير بس انه تتخلى عن هويتا وتبقى يا فجاة بقدرة قادر سمرة ولا بيضا لحدي ما تموت؟؟؟

اما بالنسبة للعمليات دي فعلاً بقت اوفر شديد ومسيخة ومافي اي داعي ليها؟؟؟ ومافي واحدة تقول لي انا واثقة من نفسي..لو واثقة من نفسك يبقى واثقة في خلقة ربك وانه ده احسن شي ليك؟؟؟ مش تغيريها كلها من الى؟؟؟حتى الغرب اللي ميتين عليه ده وبتقلدوهم الفنانات والممثلات بيعملوا عمليات تجميل لكن الملامح حقتهم وتقاسيم الوش بتبقى زي ماهي موجودة..مابضيع لانه اللي هبشوا في وشهم بكون شي بسيط لايذكر لكن هنا لو عليكم تعملوا مية قناع وتشيلوا وتركبوا اي قناع يعجبكم عشان التغيير؟؟؟

لا بجد ليه البنات مابرضوا بخلقتهم..يعني نحن عارفين انه في جد ناس محتاجين للعمليات دي وديل بعذرهم..بس البنات العاديات..مافي شي ناقصكم؟؟ولا هو الهوس بالجمال والكمال!!!مافي شي اسمه كمال؟؟؟لكن زي مابقول طول عمركم ماحتتغيروا يا عرب وخليكم في المطبات الصناعية ان شاء الله تنفعكم...!!طبعاً اي زول حيقرا الكلام ده حيقول غيرانة ههوووو...!!

وفي النهاية مافي احسن من كلام ربنا في سورة النساء قوله تعالى"وَلأُضِلَّنَّهُمْ وَلأُمَنِّيَنَّهُمْ وَلآمُرَنَّهُمْ فَلَيُبَتِّكُنَّ آذَانَ الأَنْعَامِ وَلآمُرَنَّهُمْ فَلَيُغَيِّرُنَّ خَلْقَ اللَّهِ وَمَن يَتَّخِذِ الشَّيْطَانَ وَلِيًّا مِّن دُونِ اللَّهِ فَقَدْ خَسِرَ خُسْرَانًا مُّبِينًا"...

georgiaelbit...ramzeleilla!!!!